- 757 -

1451. Juli 8. Ohlau.

Johans vnd Heinrich von gotis gnaden in Slesien herczog herren zcum Brige vnd Haynaw etc.

Vnsir hawlde vnd besundere gunst liben getrauen. Als ir wol wisset, das wir euch uffte vnd dicke ermanet haben schrifftlich vnd muntlich kein vns vor zcunemen vnd dem also noch czugehin in mossen also die manschaffte der lande Legnitcz, Goldberg vnd stat Goltberg getan habin uff bekante hawldunge vnd vnsir erbrecht, des ir euch ye kein vns enthaldin hot bishyher noch solchir aussproche vnsers gnedigen herren des Romischin konigis von wegin vnsirs gnadigsten herren konig Lasslaws, also ist vns gar wol offinbar vnd landkundig, das vnsir gnedigir hirre der Romische konig vns ein rechtistag gelegit hot den nestin montag nach Viti nestuorgangin kein Bresslaw, do vns denne nicht ein furstenlich recht bestalt ist noch deme also vnsers gnedigsten hern des Romischen konigis briff, den her vns wff den selben tag geschickit hot, ynneheldit vnd clerlichen awzweiset, do wir vns zcum rechtin irbotin habin wff denne genanten tage vnd hetten gerne wollen recht nemen vnd gebin, das hot vns nicht mocht czawen, das do wol offinbar ist, sind ir denne wol hörit vnd uornemet, das vns nicht recht geczawen mag vnd die sachen mit wffczogen mit vns vmbgehin, also bittin wir vnd begern von euch deme kegin vns noch zcu gehin ane ferener wffczog, also die manschafft der lande Legnicz, Goltberg vnd dy stat Goltberg geton haben wff vnsir erbrecht vnd bekante hawldunge, das wollin wir in allim gute kein euch vnd allen ewerb nochkomen gnediglichin irkennen vnd nymmermer vorgessin; auch ap euch ymand andirs vndirrichten wurde, das irne ein gelimpfin an vns abegegangin were, der hot euch vnrecht vndirricht vnd ist nicht, vnd ist wol kundig vnd offinbar fursten, herren, rittern vnd knechvnd vil guten lewten, die do vmb vnd dirnebin gewest sein, das der abegang gewest ist an des allerdurchlauchtigisten Romischen konigis macht manne nemlichen her Reiprecht vnd nicht an vns vnd begern hiroff ewir antwort. Geben zcur Olaw am dornstage vor Margarete. Anno etc. Lprimo.

Rückaufschrift: Den erbarn vnd weisin hantwergmeistern des hantwerckis der tnchmachir zu Legnitcz vnsirn libin getrauen

O. d. St. L. No. 400. Papier mit Siegelresten. Uebereinstimmend an demselben tage: den libin getrauen hantwergmeistern der czechen der gerbir, sneider, becker, korsschener, fleischir, meltczer, smede, kretschmaren, schmachern, kromer, der huter vnd iren czechin gnossin czu Legnitcz. Origg. d. St. L. No. 401—411.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866